生活｜月餅妹之體驗

放左2個月暑假

上網見到餅店請臨時店員

就諗住去試下 點知一見就請左
唔好以後我淨係識得吃喝玩樂去旅行
其實我係會工作架

9月1日 學生開始返學

我就開始月餅妹既工作

咁大個女都未做過SALES

亦好幾年無做過要長時間企同面對客既工作

真係一個挑戰

第一日返工 要開始記住二三十款月餅

唔同既禮盒包含咩月餅 買月餅有咩優惠

咁都好正常

之後就見識到強國人既威力啦

黎買幾千蚊月餅 比完錢就叫我地幫佢地拎去停車場

X! 真係好鬼重架

第一日放工返到屋企 真係攰到一個點

連飯都無食就即刻沖涼瞓覺

第二日起身發覺左手膞頭同老鼠仔都好鬼刺痛

幾痛都都係要工作既 只希望強國人唔好再出現啦
但係即使強國人唔出現
我都仍然係要搬月餅
一盤盤裝有最多72個正常SIZE月餅既盤
每個月餅重~190g, 一盤就可以重超過13kg

每搬一盤就感覺到左手肌肉既刺痛
唔知D大隻佬喺GYM房舉啞鈴舉到嗌出黎
係唔係就係因為要衝破呢種肌肉刺痛既感覺呢

返工第三日 就被指派去工廠將月餅入罐
過程真係好緊湊亦好緊張
因為你慢左 就會拖慢後面既步驟
不過亦因為無停手 時間好似過得好快
好似一陣就夠鐘食飯 食完飯一陣就夠鐘放工
12個人一日入左7千幾罐月餅 好勁!
仲有去工廠工作係會包午餐
三餸一湯 白飯任裝
唔係講笑 D餸都煮得幾好食架喎~

去到第4日 要OT 差唔多返左成十二個鐘
全日都係得半個鐘食飯休息

到第6日我終於放假啦
都係喺屋企瞓覺休息
左手肌肉終於無咁痛

第一個星期過去 開始習慣
放工唔再係即刻沖涼瞓覺
而係可以再睇一陣電視

隨著我返工既日子越來越多
就遇到越多奇怪問題 無理顧客等等
不過好彩既係 有咩我解答唔到既問題
都可以向其他同事求救
佢地經驗比我豐富嘛

同埋真係差唔多日日都有水客黎入貨架喎
月餅 曲奇 禮盒 蛋卷 馬仔
真係估唔到原來馬仔都有得走水貨 哈哈
不過佢地真係好勁 
拖一個大喼 再手拎2,3個大膠袋
如果係月餅真係好重架
佢地賺既都係我無可能賺到既辛苦錢
雖然我佩服佢地 但絕對唔會認同

講返我既工作
其實我主要係企喺月餅檔
推銷優惠 吸引客人買多D月餅
解答客人對月餅既問題
叫客人去收銀處比錢 再憑收據過黎拎月餅
客人比收據我睇 我執月餅比佢地
適當時候為月餅檔補給月餅
仲有其他與月餅相關既跑腿工作等

當然 因為餅鋪唔單止賣月餅既
有其他客人入黎問其他產品既問題時
我都要聽下其他同事點答 如果下次有客問我
咁我都可以答下D簡單常見既問題

然而比較熟我既朋友都知
我對英文既恐懼感 尤其係對話

但返得呢份工 我人企喺度
當有外籍客人入黎問我問題
我根本無得避 只可以硬著頭皮去面對
用所有可行既方法嘗試去解答佢地既問題
當然有D問題係我答唔到
例如黃蓮蓉同白蓮蓉有咩分別?
記得當日係我頭幾日返工 其實連我自己都唔知有咩分別
我都唔記得我答左佢D乜 但肯定佢地係唔明既
不過佢地都體諒 或者當我唔識英文啦 哈哈
雖然呢次我答唔到 但我返屋企有認真研究應該點答架

仲有 喺佢地既發問既同時 
我亦學識左幾個英文
例如奶黃原來即係吉士Custard
蛋黃係Yolk
蓮蓉係Lotus Seed
合桃係Walnut
金華火腿係Chinese Ham
綠豆係Mung Bean
我諗我以後都會記得呢幾個英文

做下做下就黎到中秋前幾日
每年中秋 餅店都會送月餅比員工
而我同長工同樣都有4盒 真係有D意外

27日入面,放左4日假, 總共返左219個鐘
最早返早上7點

最夜放晚上9點半
最長一日返左12.5小時

你睇我既工作只係行行企企
其實我仲要搬搬抬抬 受客人氣
一日企足12個鐘真係好攰架
有客人有野做既時候都仲好D
無客人既時候真係又悶又眼瞓

做完之後更覺SALES真係唔易做呀

仲有以前我以為SALES一日見咁多客
唔會認得D客人
但做完先知 有D比較特別既客人
真係見完一次就會認得

呢一個月過得雖然辛苦
但我好慶幸自己有堅持完成呢個任務
因為真係一個好好既體驗
去到最後一日 仲有DD唔捨得

因為同事們都好好
我覺得佢地之間就好似一個家庭咁
雖然我只係一個過客 
但係佢地有野食都會分埋比我
我覺得係好幸運既一件事
多謝你地 後會有期=]